أنت الوحيد الي اخاف ازعله وامشي معه سيده ....

أنت الوحيد الي اخاف ازعله وامشي معه سيده ....


جابك الله من غياب ضيق صدور المباني
قبل لاالوحشه تزعزع بيتك الصلب وتبيده
بيتك الي من رحلت وكل جدرانه تعاني
ماتحمل ينتظر شهرين وعيونك بعيده
الله العالم لو انك جيت متأخر ثواني
ماتشوف الا بقايا من حصاه وحديده
من عرفتك وانت تايه من مواني في مواني
وتارك قلبي مولع من وقيده في وقيده
ضاعت سنيني احد بها الليالي وتحداني
وانت ماتشبع غياب وماتخاف من النقيده
ودي اتحمد لك الله بالسلامه مامداني
كل ماتوصل برحله ترجع برحله جديده
دام تدري كل وجه غير وجه الله فاني
ياخي اكسب لك ثواب وخاف ربك في عبيده
كان فيني عيب قلي فيني العيب الفلاني
كان هرجي مزعك في شي قلي لاتعيده
عيب تصغر في عيوني وانت برقاب الغواني
ليه تستسهل طعوني وانت خابرني وليده
لعنبوك ان مت بيدك وش يفكك من اخواني
لحزنوا ربعي على فرقاي شلي تستفيده
انت منت الي عشقته انت اكيد انسان ثاني
ليه صرت بها البرود وبها الاحاسيس البليده
وين حبك للزعل وين العناد الاولاني
وين حنية زمان وفرحة العمر الرغيده
وين ذاك الي ليااقبل مايبات الا بماني
وين راح الي ليقفى مايروح الا فقيده
واحد من جابه الله بس يامر ويعصاني
أنت الوحيد الي اخاف ازعله وامشي معه سيده
مابغيت اطيح بيده لين ماربي بلاني
والا انا لو هي بكيفي مابغيت اطيح بيده
ذاك بس الي ليامن جيت له لخبط كياني
الي بنظره ينشف دم قلبي في وريده
قبل اشوفه اجمع له احلى القصايد والمعاني
وان لقيته ماعرفت اقوله جمله مفيده
الف مره قبله اعد القصيده من لساني
ولعنبوه ان جيت عنده قمت اخربط بالقصيده
امدحه وانا ادري انه لوتباطاني نساني
انطحه وانا اعرفه مجنون وافكاره عنيده
من يسويبي سواتك يالرهيف الاسمراني
من هو من الناس غيرك غلطته ترفع رصيده
من يقص جناح طيرك وانت اعز انسان جاني
ليه اخاف رماح غيرك وانت ضرباتك سديده
ان تبعتك اتبعك من طيبي وواسع بطاني
والا انا لاجيت اكيد انسان تدري كيف اكيده
اقدر انزع لك ثيابي والبس ثياب الاناني
واقدر اطلع من عذابي والعب بدورك واجيده
ومستعد اكسب رهاني لو بغيت اكسب رهاني
واخدعك بإحساس كاذب واتحدى من يصيده
ابكي انا لاشفت خلي حط غيري في مكاني
والله اني لتركه واصد واعشق سيد سيده
جيت ما ابيك تحقرني جيت ابيك تعز شاني
جيت ابي فزعة ضلوعك من مشاعرك البليده
خلني داخل حدودك واجبر بخاطر زماني
اكذب بباقي وعودك واصدق بلحظه سعيده
انتشلني من برودك لو تولع بالمحاني
عطني احساس بوجودك وخذ كل الي تريده
تكفى ولياقلت تكفى بيع خلق الله عشاني
لاتضيع من يديني فرصة العمر الوحيده
يعلم الله شفت منك ومن غيابك ماكفاني
كان ماتقدر تخفف هم قلبي لاتزيده
شف غيابك وش مسوي بالصدور وبالمباني
وانت تدري كيف كانت صدمة غيابك شديده
والله انك لو وصلت البيت متأخر ثواني
ماتشوف الا بقايا من حصاه ومن حديده